Dokumenta som ligg til grunn for vedtaket om parkeringsanlegg under torget, er eit studium verdt. Du skal leite lenge for å finne eit einaste argument som talar for bygging av dette anlegget. Like vel har fleirtalet i bystyret bestemt seg for å forsere byggestart av frykt for at folk skal få seie si meining om saka i kommunevalet.
Fagetaten i kommunen har lagt fram solid dokumentasjon på at vi har stor overkapasitet på parkeringsplassar i sentrum, og den er aukande på grunn av vellukka tiltak for å redusere privatbilismen. I Gyldengården og Slottet er det til ei kvar til 200 ledige parkeringsplassar, får vi opplyst.
Bystyret sa nei til å bygge parkeringsanlegg under torget i kommunal regi. Men det stoppa ikkje tilhengarane av prosjektet. Kommunen tar no store kostnader for å legge til rette for at private kan gjennomføre prosjektet — eit prosjekt som strir i mot vedtatte målsetningar om å redusere privatbilismen og legge til rette for at kollektivtransporten blir meir konkurransedyktig. I avtalen med utbyggarane har ikkje kommunen lagt ei einaste føringar som kan hindre at det private parkeringsanlegget undergrev den kommunale parkeringspolitikken.
Rett bør være rett
Etter å ha leita i saksframlegg og planar fant eg til slutt eitt argument for å bygge parkeringsanlegget. I Kvadraturplanen blir det hevda at det har stor symbolverdi å kunne køyre rett inn i hjarte av kvadraturen. Men stopp litt. Det er kanskje grunn til å spørre kva vi signaliserer når vi lar privatbilen få storstova i byen. Kva er symbolverdien av å la private aktørar rive ned det kommunen har oppnådd i arbeidet for ein meir miljøvennleg lokaltrafikk? Kva meiner miljøvernministeren om ei slik prioritering?Det er ikkje første gang vi har diskutert parkeringshus under torget i Kristiansand. SV fronta den same kampen på slutten av åttitalet. Den gangen vant miljøargumenta og respekten for dei historiske verdiane på torget og i parken, og prosjektet blei skrinlagt. Dei same argumenta er minst like aktuelle i dag, og dei har brei støtte blant folk i byen. Det er absolutt ingen grunn til å forsere dette prosjektet for å hindre at folk får sagt si meining i val.