Fylkesmannen tilrår at fleirtalet i fylkesutvalet snur og seier NEI til outlet-senter. Det vil vere klokt å lytte til Fylkesmannen.
Venstres Sara Sægrov Ruud vil på nytt fremme forslaget om å seie nei til etablering av outletsenteret, slik også fylkesrådmannen gjer med grunnlag i dei vedtatte kjøpesenterplanane. Sist fekk forslaget om å seie nei tre av ni stemmer i fylkesutvalet. Ap (2), Sp, H og Frp stemte for etableringa, mens Venstre, KrF og ein av dei tre i Ap stemte mot.
Ta vare på småbutikkane
Dette handlar om å respektere dei planane fylkestinget har vedtatt med stort fleirtal, og det handlar enda meir om å ta vare på småbutikkane frå Farsund til Risør og Hovden. Så innstendig eg kan vil eg oppfordre alle medlemer av Handel og Kontor, alle som arbeider i småbutikkar i landsdelen, alle som likar å handle i byane, alle som synest det er fornuftig å gå i butikken i nærmaste by— eller bygdesentrum om å innstendig be Arbeidarpartiet, Senterpartiet, Høgre og Framstegspartiet om å snu.
Fylkesordførar Tellef Inge Mørland, Arbeidarpartiet, seier til Fædrelandsvennen at Aust-Agder må seie ja nå fordi Vest-Agder har tillatt så mykje på vestsida av fylkesgrensa før. Javel? Det er jo dei mange etableringane på Vest-Agders side av fylkesgrensa som har øydelagt så mykje for så mange, og som gjer at folk køyrer bil lange vegar for å handle det vi burde handle i nærmaste by- og bygdesenter.
Venstre meiner vi ikkje kan fortsette ein gal og lite miljøvennleg praksis, berre fordi noen andre har gjort dumme ting før. Det gjer jo ikkje situasjonen betre å sleppe til enda eit stort handlesenter, i den sårbare situasjonen mange små klesbutikkar i Farsund, Lyngdal, Vigeland, Mandal, Tangvall, Kristiansand, Vennesla, Evje, Valle, Hovden, Birkeland, Lillesand, Grimstad, Arendal, Osedalen, Tvedestrand, Risør og Brokelandsheia er i?
Slutte å logre med halen
Eg ber innstendig Arbeidarpartiet, Senterpartiet, Høgre og Framstegspartiet slutte å logre med halen for sterke kapitalkrefter og heller støtte distrikta og dei bysentra vi har på Sørlandet. Vi kan ikkje risikere at mange butikktilsette i heile landsdelen mistar jobben. Sørlandsparken er ein støvsugar som legg store delar av handelslivet i landsdelen øde. Kjenner du noen politikarar i Arbeidarpartiet, Senterpartiet, Høgre og Framstegspartiet på fylkesplan i Aust-Agder? Ring dei og be dei stoppe dette!
La oss kjempe for småbedriftene, og for dei mange som arbeider i klesbutikkane og liknande butikkar i heile landsdelen.