Se bileta over!
VALLE: Ordførar Tarald Myrum veit han risikerer å fornærme nokon, men seier det like vel.
— Ingebjørg Homme er nok den største kulturberaren vi har her i Setesdal.
Så legg han til noko som også kan vere ein vågal påstand.
— Ho er nok også den her i dalen som har best kjennskap til Setesdalsbunaden.
Kongeleg heider
Søndag kveld fekk Ingebjørg Homme kongens fortenstmedalje for innsatsen for Setesdalsbunaden og for å ha teke vare på unik kulturarv frå dalen.
— Eg vaks opp i ein heim der mor mi sauma bunad og der det var spel og fortellingar om gamle dagar. Slik starta den interessa, fortel Ingebjørg Homme.
I heimen på Aamlid i Valle, var det også ei kasse med gamle bilete.
— Det var frykteleg spanande. Der var det både bilete frå Setesdal og Amerika, seier ho.
Kjennskap
På slutten av 50-talet kom mann hennar over ein annonse om mørkeromsutstyr. Då byrja Ingebjørg Homme å framkalle gamle negativar. Ho reiste rundt i bygda og fann gamle bilete og folk kom til henne.
Innan digitalisering vart vanleg, hadde Ingebjørg Homme samla det som har blitt ei unik samling bilete, der dei første er frå 1850-talet. Det var like etter fotografiet vart oppfunne.
— Det er moro å bli kjend med dei som levde før og sjå korleis dei såg ut, seier ho.
Kulturskattane
Dei gamle bileta Ingebjørg Homme samla inn, er blitt ein attraksjon på folkebiblioteket i Valle.
Men det er ikkje berre bileta ho har hindra frå å ende sine dagar i bortgøymde kott. Ho har samla inn gamle stev og viser og er ein av eldsjelene bak nettstaden Vallemål. Her har ho vore med og samla inn over 10.000 ord.
— Korleis står det til med Setesdalskulturen i dag?
— Det er ikkje så verst, om ein ser bort frå språket. Det ser det ut til at det er litt vanskeleg å halde på. Men bunaden er det mange som vil ha.
Så har då Ingebjørg Homme sydd bunad til tidlegare kulturminister Åse Kleveland. Samt representantar for familien som no gjer henne heider. Märtha Louise fekk nemleg sydd seg stakk til konfirmasjonen i 1987. Kongefamilien har med andre ord visst om henne ei stund.