Kultur— og kyrkjeminister Valgerd Svarstad Haugland reiser på offisiell vitjing til London 14. - 18. mai. Statsråd Svarstad Haugland opnar den tradisjonelle 17. mai feiringa i London med barnetog og held tale under festmiddagen i Den Norske Klub.- Å feira 17. mai i London er litt spesielt. England er eit av våre viktigaste samarbeidsland, både når det gjeld handel og kultur. Under andre verdskrigen flykta nordmenn til London for å kjempa vidare for Noregs sak, og nordmenn heime lytta ulovleg på radio frå London for å høyra siste nytt. I dag reiser nordmenn fyrst og fremst til kulturmetropolen London, kulturinstitusjonane her er førebilete for våre eigne, seier kultur- og kyrkjeminister Valgerd Svarstad Haugland som ser fram til å feira 17. mai saman med nordmenn busette i utlandet.Under London-opphaldet skal statsråd Svarstad Haugland ha politiske samtalar med statssekretær Andrew McIntosh i det britiske kulturdepartementet. Ho skal også ha samtalar med leiinga i BBC og British Library. Kultur- og kyrkjeministeren skal vitja Tate Modern og sjå utstillinga til Ingar Dragset og Michael Elmgren.