BERGEN: — Eg trudde det skulle smaka meir beiskt, men dette går det jo fint an å eta, seier Geir Skeie til Sandefjords Blad etter å ha gjort den plagsame iberiasnigelen om til eit kulinarisk måltid.
På oppdrag frå avisa tar VM-vinnaren i bruk sin eigen metode for å bli kvitt dei såkalla mordarsniglane. Sniglane skal fangast levande, sultast ut, bli kokte, marinerte og steikte i frityrolje, skriv Bergens Tidende.
- Alternativ matkjelde
Skilnaden mellom hageplaga og franske luksussniglar, er ikkje stor, meiner Skeie.
— Den einaste skilnaden frå dei med hus, er at desse har eit litt tjukkare skinn, seier Fitjar-kokken til avisa. Han meiner eksperimentet er nyttig.
— Eg synest dette var eit morosamt eksperiment, for me må jo etter kvart byrja å sjå etter alternative matkjelder her i verda, seier Skeie, som legg til at å bruka dei små og delikate sniglane gir best resultat.
Frå snigelens heimøy
Sjølv har Skeie nesten lokal tilknyting til brunsnigelen, så han burde veta kva han snakkar om. Litt lenger sør på heimøya hans Stord, fekk nemleg ein stakkar gartnar med seg ein uboden snigelgjest heim på slutten av åttitalet. Dermed var epidemien i gong.
Også tidlegare har kokkar prøvd å gjera sniglane om til ei kulinarisk oppleving. For ti år sidan stilte meisterkokk Fredrik Hald opp i BT for å komponera tre variantar av brunsnigel.
— Brunsnigelen har eit drag av ammoniakk-smak, og er ikkje så elegant i smaken som ein førsteklasses fransk snigel, sa Hald til BT den gongen.
Billedkunstner Ingri Egeberg og venninna Karen Melvær blei inviterte til å testa ut måltidet - og heller ikkje den gongen skuffa brunsnigelen.
— Det smaker herleg av gras, som om du ligg på plenen og bit i graset, sa Egeberg den gongen.