VALLE: — Dette er blant dei mest originale albuma i heile verda. Det gjeld både eksteriøret og innhaldet, seier Hallvard T. Bjørgum til Fædrelandsvennen, og brettar ut boksen med hefte som inneheld biografien om byglendingen Olav Hegland og tre cd’ar. Den fyrste cd’en inneheld Hallvard T. Bjørgum og Gunnar Stubseids eigne tolkingar av Hegland sitt slåttespel. Den andre inneheld private lydbandopptak av Olav Hegland frå tida 1953 til 1968, samt grammofonplater innspela for plateselskapet Colombia av Olav Hegland frå 1930-talet.
Eksteriørmessig har Bjørgum henta inspirasjon frå praktalbum som er utgjeve av eigen favorittar som Johnny Cash og Hank Williams, fortel Bjørgum om albumet "Sterke slag" som er gjeve ut på Sylvartun Folkemusikk. Diverre er mange sider i heftet lause i denne fyrste utgåva. Bjørgum fortel at nytt opplag er under produksjon slik at dette vert retta opp.
Nasjonalromantisk
— Men sjølvsagt er det musikken og den kulturhistoriske dokumentasjonen som gjer dette til ei heilt spesiell utgjeving, sier Bjørgum.
Bjørgum og Stubseid er samde i at frå 1920-talet og til langt ut på 1960-talet fantest knapt større konsertspelemann i Noreg på hardingfele enn Olav Hegland.
— Han dikta slåttar, men lærde og av spelemenn som Eivind Åkhus og Knut Jonsson Heddi. Han skapte sin eigen stil. Han var litt fiolinistisk og var fan av Ole Bull i ei nasjonalromantisk tid. Han var proff og tente gode pengar, fortel Stubseid.
Improviserte
— Hegland var ein meister til å improvisere på hardingfele. Visst nokon kritiserar Gunnar og meg for ikkje å spele nøyaktig slik som Olav Hegland, så var ikkje Hegland sjølv i stand til å spele likt heile tida. Slik er det med dei største musikarane opp gjennom tidene – dei kan improvisere, seier Bjørgum.
Dette fekk publikum høyre i ein stappfull festsal under Setesdalskappleiken laurdagskvelden då Gunnar Stubseid og Hallvard T. Bjørgum heldt lanseringskonsert for trippel-cd’en "Sterke slag".